Á hverju ári koma fjölmargir gripir í ljós í þeim fornleifarannsóknum sem Fornleifastofnun Íslands stundar. Fyrstu gripir sumarsins eru þegar teknir að tínast í hús, en á síðasta ári fundust um 5000 gripir á 15 rannsóknarstöðum og er þá ótalinn mikill fjöldi dýrabeina sem einnig fundust við uppgreftina. Töluverður munur er á fjölda funda gripa milli staða, í sumum rannsóknum finnast engir gripir en við aðrar koma þeir upp úr jörðu í þúsundatali; sem dæmi má nefna að um 4000 af gripum ársins 2023 komu úr einni rannsókn, á Vesturbúðarhól á Eyrarbakka. Að vettvangsvinnu sumarsins lokinni tekur við úrvinnsla að hausti en alla gripina og beinin þarf að hreinsa, skrá og pakka í viðeigandi umbúðir eftir því úr hvaða efni þeir eru svo að þeir varðveitist sem best. Til að mynda eru málmgripir settir í loftþéttar umbúðir með silikageli til að halda rakastigi sem lægstu meðan lífrænir gripir, s.s. viður og bein, eru hafðir í götuðum fundapokum í pappakössum til að halda góðu loftflæði um gripina. Sérfræðingar sjá um að greina gripina en sumir þeirra eru of illa farnir eftir langa veru í jörðu til að greina megi nokkuð annað en efni þeirra. Í öðrum tilvikum má úrskurða um nákvæman upprunastað eða framleiðsluár. Samanlagt veita gripir sem finnast við fornleifauppgröft mikilvæga innsýn í þær minjar sem grafnar eru, t.d. um aldur mannvirstarlagsins sem þeir fundust í en gripirnir geta líka gefið vísbendingar um daglegt líf, viðskiptasambönd við umheimin og handverkshefðir. Að rannsóknum loknum verða allir fundirnir afhentir Þjóðminjasafni Íslands til langtímavarðveislu.

Rannsókn á áhrifum skógræktar á minjar og menningarlandslag heldur áfram nú í ár en verkefnið er styrkt af Fornminjasjóði. Fram að þessu hefur verið lögð mest áhersla á að safna gögnum af ýmsu tagi, bæði sögulegum gögnum um skógrækt og skipulagsmál og landfræðilegum gögnum sem varða bæði skógrækt og minjar. Í ár er áætlað að gera vettvangsrannsóknir á völdum svæðum til að reyna að varpa ljósi bæði á afdrif einstakra minjastaða og langtímaáhrif skógræktar á heildir og menningarlandslag. Strax á fyrsta ári verkefnisins var ráðist í að þróa hliðarverkefni sem hlaut í upphafi árs styrk frá Norrænum vinnuhópi um líffræðilega fjölbreytni (NBM), en þar er einnig lögð áhersla á landslag og menningarumhverfi. Samstarfsaðilar okkar í verkefninu, sem er til þriggja ára, eru Tjóðsavnið í Færeyjum og Norski vísinda- og tækniháskólinn í Þrándheimi (NTNU). Markmiðið með þessu verkefni er að efla samstarf milli landanna og bera saman ýmsa þætti sem varða bæði landslag, menningarminjar og skipulag skógræktar.